و اخيرا بعد 3 محاولات فاشلة ضبطت الماكرون !!! اللي يقولكم انه صعب ترا ما عنده سالفه...
ماكو اسهل منه
بس لازم تلتزمون بكل حرف ومو بس بالمقادير, حتى بالمواد ..
ألحين اول شي نبدي شنو تحتاجون, ولما اقول تحتاجون هالاشياء يعني صج تحتاجونهم و ماكو لهم بديل! :p
راح تحتاجون صينية فرن تكون مسطحه ...
انا شريت هالصينية من تافولا.. واهيه كانت لها افضل نتيجة..
تافولا محل بشويخ يبيع مواعين ومعدات الخبز .. موجود بشويخ بمجمع الريم ..(ورا سوق لندن وتشوفونه من جسر الغزالي)
ثاني شي تحتاجون ماعون خلط ستانلس ستيل أو زجاج.. انا خلطت بجدر ستانلس ستيل
ثالث شي تحتاجون كيس تزيين الحلويات .. أو الانبوب.. المهم شي لصب الماكرون على شكل دوائر..
رابع شي ورق البارشمنت .. مو ورق زبدة! parchment paper ...
spatula .. ماعرف اسمها بالعربي بس تكون قفشه مسطحه طرفها بلاستيك ..
اخر شي, ميزان ..
بس اذا ما ودكم بالميزان عادي انا مصورة المقادير بالضبط بس لازم يكون عندكم كوب القياس..
المقادير:
بياض 4 بيضات (او 110 جرام) .. جهزوه قبل فترة من الشغل.. خلوه على درجة حرارة الغرفة مدة ساعتين او اكثر
30 جرام سكر (او ملعقتين طعام)
100 جرام لوز مطحون والافضل شراءه جاهز (او كوب و ربع لوز مطحون ومنخول) الصورة موجودة بالاسفل
25 جرام طحين (أو ربع كوب طحين)
220 جرام سكر بودر (أو كوب ونص) الصورة موجودة بالاسفل
للنكهات:
الروز : ملعقة صغيرة روح الورد مع نقطة لون وردي او احمر..
الفستق : يستبدل اللوز بالفستق المطحون
الكاكاو : تضاف ملعقتين طعام بودرة الكاكاو cocoa powder
هذي صورة اللوز المطحون مع الطحين (بعد النخال)
وهذي صورة السكر البودرة بعد النخال
ليش ننخل اللوز والفستق والسكر؟؟
لانه اي قطع كبيرة بتخرب الماكرون وماتخليه ينتفخ عدل.. شوفو شلون القصع الكبيرة ظلت؟ انا اخذتهم وطحنتهم بمطحنة قهوة ورديت نخلتهم ..
الطريقة:
1- أول خطوة اهيا النخال ثم اخذ القياسات ..
2- ثاني شي نخلط اللوز (او الفستق) مع السكر البودرة
3- نبدي نضرب البيض بالخلاط بسرعة عالية لما يبدي يطلع فقاعات نضيف السكر العادي.. ونخلط تقريبا مدة 8 دقائق لين تصير كريمة ثقيلة.. اذا تبون تعرفون اذا وصلتو للدرجة المطلوبة, ميلوا الماعون شوية.. المفروض الكريمة ما تتحرك ..حتى لو تقلبونه تضل ثابته.. ديرو بالكم تخلطونه اكثر من هالمرحلة لانه بيخترب ..
هني مرحلة الفقاعات. نضيف السكر
وهني بعد مايصير جاهز
4- الحين نضيف الخليط الناشف والنكهات ونخلطه بالـ spatula ... ودربالكم.. لا تزيدون الخلط عن 60 دورة .. لانه اذا خلطتوه بزيادة بيصير سائل ..
5- حطو ورق البارشمنت على صينية الفرن وحطو خليط الماكرون بكيس التزيين وصبوه على شكل دوائر ..
هذا الماكرون بعد الصب على طول
عقب 5 دقايق او اقل بتشوفون انه تعدل السطح.. اذا ما تعدل بللو ايدكم وشوي شوي عدلوه
6-نخلي الصينية ترتاح بدرجة حرارة الغرفة مدة نص ساعة الى ساعة .. و بهالاثناء نشغل الفرن لدرجة حرارة 160 أو 325 فهرنهايت.
7- نحط الماكرون بالفرن مدة عشر دقائق الى 15 دقيقة مو اكثر!
8- تنطرون الماكرون يبرد بعدين تشيلونه من الصينية وتحشونه بأي حشوة تبونها.
الحين نيي حق الحشوات..
حق ماكرون الكاكاو انا استخدمت نوتيلا عادي. تقدرون تسوون chocolate ganache طريقته موجودة بكذا سايت.
لماكرون الروز, انا احب الفستق فذوبت كاكاو ابيض بحمام مائي مع شوية زبدة و فستق مطحون.. والكميات على حسب ماكو مقادير, انا حبيت الفستق يكون طعمه الطاغي فكثرته.. المهم انه الحشوة تكون مثل الكريمة الثقيلة..
تقدرون تستخدمون lemon curd مع الروز او مع الماكرون بدون نكهه هم تلقون الطريقة بسايتات حتى بيوتوب موجودة.
ماكرون الفستق استخدمت وياه نوتيلا, وتقدرون هم تستخدمون الفستق مع كاكاو ابيض :)
هذا السايت وايد فادني تقدرون تشوفونه.. وحاولو شوفو كذا فيديو قبل لا تبدون :)